الخروج عن النص من جديد

فيه ميراث بيتم توزيعه وقت الولادة...
بمجرد ما حضرتك تتولد.. بتبدأ فى استلام تركه ثقيلة و ممتدة من كل أجيال أسرتك، دول يسلموك مخاوفهم.. و دول يسلموك نقط ضعفهم.. و دول يسلموك نصوص حياتية معدة مسبقا..

إحنا محتاجين نقف وقفة حاسمة و جادة نراجع فيها كل ما تسلمناه.. محتاجين نخرج عن النص.. و نبدأ فى الكتابه من جديد.. بأقلامنا نحن..

فى الباب الأول من هذا الكتاب ، هنعرف إيه حدود النفسية..
وإيه هى نفسك الحقيقية و نفسك المزيفة.. و ليه بنكرر أحيانا نفس الغلطة .. هنتعلم عن المواقف غير المنتهية.. و المشاعر اللى بنحسها.. بس هى فى الحقيقة مش مشاعرنا..
هانكتشف أزاى ممكن نكون عايشين نصف حياة... وايه الأدوار الى بنلعبها فى سيناريوهات حياتنا..

فى الباب الثانى ..هانتكلم عن الصوت الداخلى الى بيطلع من جوانا، و يفسد علينا طعم كل شئ..
هانستعرض بالأمثلة بعض القررات الى بناخدها و احنا صغيرين، و اللى بتتغير معاها حياتنا للأبد..

هنتكلم عن الإنتحار .. وإيه معنى إن حد يقرر ينهى حياته..
هانشوف الخوف من الهجر و الوحدة ممكن يعمل إيه فى أصحابه..
هانفهم اختياراتنا بتقول عننا إيه.. و هنعرف ازاى مانخليش احتياجاتنا تبهدلنا..

يالا بيما نخرج عن النص.. فى اتجاه النور.. فى اتجاه الحياة.